నేల  రాలిన  పారిజాతం .                           (02)                  కధానిక.   గత వారం   : జగన్నాధం , షౌకత్ అలీ , విశ్వనాధం  మంచి  మిత్రులు .బడిపంతులుగా   పదవీ విరమణ  తర్వాత  హైదరాబాదు నగరంలో స్థిరపడతారు  జగన్నాధం  దంపతులు.  ఒకరోజు   విశ్వనాధం   కుమార్తె   పారిజాతం  అనుకోకుండా   బజారులో జగన్నాధానికి   తారసపడి   పలకరిస్తుంది.   సాయింత్రం  జగన్నాధం  ఇంటికి  వస్తానని చెబుతుంది  పారిజాతం . అన్నట్లుగానే   సాయింత్రం  వస్తుంది  పారిజాతం . తనతో కూడా  షౌకత్ అలీ  కూతురు  షబ్నంని  తీసుకొని   వస్తుంది  .  ఇక  చదవండి ..... ...  (గత వారం తరువాయి . )  

వృత్తి  రీత్యా ముగ్గురమూ ఒకే చోట ఉండటంతో నేను ,విశ్వనాధం, షౌకత్ అలీ  దాదాపు  ప్రతీ రోజూ కలుస్తూ ఉండేవాళ్ళం . మా  కుటుంబ సభ్యులు  కూడా ఒకరితో  ఒకరు బాగా  కలిసిపోయారు .  అలా  కాలం పదేళ్ళు ఆనందంగా గడిచిపోయింది  రాజమండ్రి లో .

పారిజాతం , షబ్నం  మా  స్కూలు  లోనే  చిన్న తరగతులు  చదువుకుంటూ ఉండేవారు . పారిజాతం చదువులో  బాగా  చురుకు.అలాగే  ఆటల్లో కూడా. 

కూతురు ఆశక్తి  గమనించిన  విశ్వనాధం  పారిజాతానికి  చదరంగం ,కరాటే  విద్యలు ఆ  చిన్న వయసు లోనే   నేర్పించాడు.    షబ్నం  చదువులో మెరిక . వాళ్ళిద్దరి  బాల్యం  చాలా  వరకు మా ఇంట్లోనే  గడిచింది . 

షౌకత్అలీ  న్యాయమూర్తి  కావాలన్న  ఆశయంతో  ఏవో పరీక్షలు  వ్రాస్తూ  ఉండేవాడు . నేనూ , విశ్వనాధం  స్కూలు మేస్టారు  గిరీతో  సంతుష్టి . 

  ఒక రోజు సాయింత్రం  నేను గోదావరి గట్టు చేరేసరికి అప్పటికే  వచ్చి ఎదురు చూస్తూ ఉన్నాడు విశ్వనాధం . 

కాస్సేపటికి  షౌకత్అలీ వచ్చి చేరాడు మాతో . "మీకు ఆనందం కలిగించేదీ  అదే సమయంలో  నిరుత్సాహ   పరిచే న్యూస్  చెప్పాలిరా ! " అన్నాడు అలీ వచ్చి  ప్రక్కన  కూర్చుంటూ .

 విశ్వనాధం నా వైపు చూసాడు . నేను విశ్వనాధం కేసి చూసాను . ఇద్దరం షౌకత్ అలీ  కేసి చూసాం  "ఏమిటీ " అన్నట్లుగా . 

"నాకు  మునసబు  కోర్టు  జడ్జి గా సెలెక్ట్  అయినట్లు ఉత్తర్వులు  వచ్చాయి .  వచ్చే సోమవారం జాయిన్ అవ్వాలి శ్రీకాకుళంలో "అన్నాడు షౌకత్ అలీ. ఇద్దరమూ  అభినందనలు  తెలిపాము . నిజం  చెప్పాలంటే  షౌకత్ అలీ   దూరంగా వెళ్లిపోతున్నందుకు   కొంత  నిరుత్సాహం  కూడా  కలిగింది.  
 షౌకత్ అలీ  మమ్మల్ని వదిలి  శ్రీకాకుళం  వెళ్ళిన  కొద్ది  రోజులకే  నాకు రాజమండ్రి  నుండి  బదలీ  ఆర్డర్లు  అందాయి . ఆ తర్వాత  విశ్వనాధం , షౌకత్అలీ  కబుర్లు  తెలియలేదు . ఎవరి  ఉద్యోగ భాద్యతలలో  వాళ్ళం  మునిగి పోయాం. 
                                                     ...  

" ఏంటి ! అంకుల్ ! ఏమిటి  ఆలోచిస్తున్నారూ  ? " అన్న  షబ్నం  ప్రశ్నకి  గతం లోంచి  వర్తమానం  లోకి  వచ్చి పడ్డా . దారం తెగిన   గాలిపటంలా . 
" ఏమీ  లేదమ్మా ! మనసు   కాస్సేపు   రాజమండ్రి  రోజులు   గుర్తు   చేసుకోడానికి   అలా   విహారానికి  వెళ్ళింది " అన్నా . 
"అవును  అంకుల్ ! మళ్లీ  మళ్లీ  రాని  రోజులు " అన్నారు  పారిజాతం , షబ్నం  ఒకేసారి . 
ఈలోగా  శేషమ్మ లోపలినించి   పలాహారం  తీసుకొని  వచ్చింది  .  వేడి వేడి చల్ల పుణుకులు , జిలాబీ . 
" మీరు  మాత్రం  జిలాబీ  ముట్టుకోకండి " అంది శేషమ్మ  పలహారం ప్లేట్లు  టీపాయి  మీద పెడుతూ . నన్ను  ఉద్దేశించి . 
" ఏం ! మాస్టారుకి  షుగరా ! " అంది  పారిజాతం .
"అవును  తల్లీ ! ఈ మధ్యనే   వచ్చింది  నాకు  షుగరు బీమారు . జిలేబీ  అంటే నాకు  ప్రాణం ." అన్నా .
"ఏమి చేస్తున్నారమ్మా ! మీరిద్దరూ ! అమ్మా , నాన్న  అందరూ  కులాసాయేనా ! ఎక్కడ   ఉన్నారు  వాళ్ళు ?  " అని  ప్రశ్నలు  సంధించింది  శేషమ్మ . 
అప్పుడు  వాళ్ళు  చెప్తే  ఈ  విషయాలు  తెలిశాయి . విశ్వనాధం కుటుంబం  విశ్వనాధం  ఉద్యోగంనుంచి   రిటైర్  అయ్యాక  రాజమండ్రి  లోనే స్వంతంగా  ఇల్లు  నిర్మించుకొని   సెటిల్  అయ్యారు . షౌకత్అలీ  ఉద్యోగంలో  అంచెలంచెలుగా  ఎదిగి  జిల్లా కోర్టు  జడ్జీగా  పదవీ విరమణ  తర్వాత  హైదరాబాద్  లో  స్థిరపడ్డాడు . అలీ  భార్య  నస్రీన్   ఇంటిపట్టున   ఊరికే  ఉండలేక  బంజారా  హిల్ల్స్  లోని  ఓ  కమర్షియల్  కాంప్లెక్స్  లో  షాపు  అద్దెకు తీసుకొని  బ్యూటీ  పార్లర్  నడుపుతోంది. పారిజాతం , షబ్నం  ఇద్దరూ  కంప్యూటర్  ఇంజనీరింగ్  డిగ్రీ   పూర్తీ చేశి  గచ్చిబౌలి  లో  సాఫ్ట్ వేర్  కంపెనీల్లో  పనిచేస్తున్నారు .  
పారిజాతం  ఆఫీసుకి  దగ్గరగా  ఉన్న  సర్వీస్  అపార్ట్ మెంట్  లో  ఉంటోంది  షబ్నం  తో  కలిశి  .  
"ఏంటమ్మా ! అమ్మా , నాన్నా  ఊర్లోనే  ఉండగా  బయట  ఎందుకు   ఉంటున్నావూ ! " అని  అడిగింది  శేషమ్మ  టీ  కలిపి తెస్తూ . 
షబ్నం  తేలికగా  నవ్వేస్తూ  "కాదు  ఆంటీ ! ఆఫీసుకీ , మేము  ఉండే  చోటుకీ  చాలా  దూరం .  ఈ  ట్రాఫిక్ జాంలు  , దూరాలతో  ఆఫీసుకి  సమయానికి  చేరుకోలేక  పోతున్నానని  అబ్బాజాన్  ఆఫీసు  దగ్గరగా  పారిజాతం ఉండే  చోట  ఏర్పాటు  చేశారు . వీక్ ఎండ్   రెండు రోజులూ  అబ్బా ,అమ్మీ  జాన్ తో ఉంటాను " అంది. 
" నేను  కూడా  వీక్ ఎండ్స్ ,  పండగలు  వచ్చినప్పుడు  తప్పకుండా   రాజమండ్రీ  వెళ్లి  అమ్మా , నాన్నని   చూశి  వస్తాను  మేస్టారూ ! " అంది పారిజాతం . 
" బావుంది . నువ్వు  చిన్నతనంలో  చదరంగం  ,కరాటే  నేర్చుకోనేదానివి  కదూ! " అని అడిగిగింది  శేషమ్మ  పారిజాతాన్ని . 
ఇంటర్  తర్వాత  ఒక  స్థాయికి  వచ్చాక  ఈ  విద్యలు  కొనసాగించడం  కుదరలేదు  అంది  పారిజాతం . ఇక  శెలవు  తీసుకుంటాము  అన్నట్లుగా  లేచి  నిలబడ్డారు  పిల్లలు . శెలవు  తీసుకొనే  ముందు  షౌకత్అలీ  అడ్రస్ , ఫోను  నెంబర్  వ్రాసి  ఇచ్చింది  షబ్నం . పారిజాతం  కూడా  విశ్వనాధం  అడ్రస్ , ఫోన్ నెంబర్  వ్రాసింది నా డైరీ  లో . 
"తరచూ  కనిపిస్తూ  ఉండడమ్మా !" అంది  శేషమ్మ . 
"అలాగే ! వెళ్లి వస్తాం " అని  ఆటో  ఎక్కారు  . 
"ఇద్దరికి   ఇద్దరూ  విద్యుత్ లతల్లాగా  ఉన్నారు " అంది  శేషమ్మ  వాళ్ళని  ఆటో  ఎక్కించి  ఇంటిలోనికి  వస్తూ . 
" మరే ! నా శిష్యురాళ్ళు  మరి " అన్నా కాస్త  గర్వంగా. 
                                                              ... 
ఓ  రెండు  రోజులు  గడిచాక  షౌకత్అలీ  కి  ఫోను  చేస్తే  నస్రీన్  రిసీవ్  చేసుకుంది .  "నేనమ్మా ! నస్రీన్ . జగన్నాధం ." అన్నా . 
"ఓహ్ ! బహుత్  దిన్  బీత్  గయే ! ఆప్ సే  మిల్కర్ . కైసే  హై .  టహరియే  మై  అలీ  సాబ్  కో  ఫోన్  దిలాతా హూన్ " అంది  నస్రీన్ . 
"ఎలా  ఉన్నావ్ షౌకత్ " అని  ఫోనులో  పలకరించాను . "ఫస్ట్ క్లాసు .నీ సంగతి చెప్పు .'అన్నాడు  షౌకత్ . 
షబ్నం  వచ్చిన  సంగతి  చెప్పాను. 
" బేటీ  నే  బతాయా   ముఝె  ములాకాత్ కి  బారేమే "
చాన్నాళ్ళకి  షౌకత్అలీ  తో మాట్లాడినందుకు  ఎంతో  సంతోషం  వేసింది . 
ఒకసారి  కలుద్దాం   షౌకత్  అని అంటే  తప్పకుండా  అన్నాడు . 
                                                         ... 
రాజమండ్రి .  సాయి నగర్ . ఉదయం  ఆరు గంటలు . 
అప్పుడే  నిద్ర లేచి  కాఫీ  తాగుతూ  తోటంతా  కలియ  తిరుగున్నాడు  విశ్వనాధం.   క్రితం  రాత్రి  పెట్టిన  మందుకి  కష్టపడి  పెంచుతున్న  పూల తోట  నిండా  బొర్రెలు  పెట్టేస్తున్న  పంది కొక్కులు  ఏమైనా  బలిఅయ్యాయా అని . గేటు  బయట  పారిజాతం  మొక్క విరగ  పూసిన   పూలతో  సన్నగా  వీస్తున్న  గాలికి  అందంగా  ఊగుతోంది . 
ఇంతలో  " మీకే ! ఫోను " అంటూ  రిమోట్  తెచ్చి  ఇచ్చింది  విశ్వనాధం  భార్య  రత్నం . 
ఎవరా ! అని  ఫోను  అందుకొన్నాడు   విశ్వనాధం. 

                                                                     ( ఇంకా ఉంది )