బాల్యోత్సాహం 

       Illustration by : Baby Aanya ,   California

    కాలం మింగేసిన బాల్యం 

  (02)
మా నాన్న బాల్యం . 
మా నాన్న బాల్యం గురించి  నాకు నాన్న ఎప్పుడూ చెప్ప లేదు . ఆయన కాలం చేసిన తర్వాత నాన్న వ్రాసుకున్న డైరీలలో ఆశ్చర్యకరమైన మనుసులో గూడు కట్టు కొన్న నిక్షిప్త  విషయాలు తెలిశాక  నా మనసు కాస్త విచలితమైన మాట  వాస్తవం .
అందుకే...   ఇక్కడ మా నాన్న  బాల్యం గురించి ఆయన  డైరీల నుంచి సంగ్రహించిన విషయాలు   ప్రస్తావించడం  సమంజసం . 
... 

చంద్రుడు గారిని  అతి  గారాబంగా పెంచారు తల్లి తండ్రులు .అదే  అదుననుకొని  మా నాన్న తెగ అల్లరి చేసేవాడు . పొలాల  గట్లమ్మట , జీడిమామిడి తోటల్లో ,పశువుల వెనకాలా , ఒకటేమిటి  అంతటా  మా నాన్నే. పొడవుగా  గిరజాల  జుత్తు  పెంచి  జడలేసేది మా బామ్మ . తన  వస్తువులు  అన్నీ కొడుకు   మెడలో వేశి  మురిసిపోయేది  లక్ష్మీనరసమ్మ . 

మా నాన్న జన్మించిన   తర్వాత  చాన్నాళ్ళకు  కలిగిన ద్వితీయ  పుత్రోత్సాహం   ఎంతో   కాలం  నిలబడలేదు లక్ష్మీనరసమ్మ గారికి.  ఆవిడ   ఆరోగ్యం  క్రమంగా క్షీణించడం  మొదలైంది.  అన్ని  వైద్యాలు  ప్రయత్నించి  గుణం   కన్పించిక  పోవడంతో  మా పితామహులు జగత్పతి గారు (బుల్లి ) తొట్టె  వైద్యం  మొదలు పెట్టించారు . 
ఆ  రోజుల్లో  మందులూ, మాకులకు  లొంగని  రోగాలకు  తొట్టె  వైద్యం  ఒక  ప్రత్న్యామ్యా యం  . ఫలితాలు  బానే ఉండి   రోగికి  కొంత  ఉపశమనం   కలిగించేది   ఈ  వైద్యం . అలా  కొద్ది  రోజులు  జరిగాక  మా నాన్నకి  తెలిసీ  తెలియని వయసు లో లక్ష్మీ నరసమ్మ గారు అనారోగ్యంతో  ప్రమోదూత  నామ సంవత్సరం  వైశాఖ మాసం  శుక్ల పక్ష  అష్టమి  నాడు (23-04-1930) గౌరీ లోకం   పొందారు .అప్పుడు నాన్న వయసు పదకొండు  సంవత్సరాలు.   ఈ సంఘటన  బుల్లి గారి  నే  కాకుండా  బాల్యంలో  ఉన్న   మా నాన్న  జీవితాన్ని  మున్ముందు కాలం లో  ప్రభావితం   చేసింది . 

(బామ్మ  వైద్యానికి  ఉపయోగపడిన  తొట్టె  ఆ తర్వాత కాలంలో  పశువులకు  చిట్టూ  ,తవుడూ  నిల్వ చేసుకొనడానికి  ఉపయోగపడింది . నా  హయాంలో ఈ మధ్యనే 2012 వ  సంవత్సరంలో ఈ  తొట్టెని    పాత సామాన్ల  వ్యాపారికి   రెండు  కిలోల  ఉల్లిపాయలకి  ఇచ్చేశాను.  ) 

... 

ఇంట్లో  ఆడ దిక్కు  లేక పోవడంతో   బుల్లి గారికి  మా నాన్నని  చూసుకోవటం ,పల్లెటూర్లో  విద్య నేర్పించటం  కష్ట  తరమవటంతో  మా నాన్నని  తన సోదరుడైన  మంగయ్య  గారి వద్ద  ఉంచి  కాకినాడలో బడిలో  చేర్పించారు .
 అన్న బుల్లి  గారు  అంటే  మంగయ్య గారికి  మిక్కిలి  గౌరవం , అభిమానం . మంగయ్య గారే  కాదు  రక్తం    పంచుకు  పుట్టిన  తతిమ్మా  సోదర సోదరీమణులకు కూడా  బుల్లి గారు  అభిమాన పాత్రుడు. బుల్లి గారు   వ్యవహార దక్షుడు . ఉమ్మడి  కుటుంబ ఆస్తుల  సంరక్షణ పరిరక్షణ ,కుటుంబ   యోగ క్షేమాలు  ఆయనే  చూసేవారు . 
  ఎంత   పినతండ్రి   ఇల్లు  అయినా   తల్లిని కోల్పోయిన  నాన్న  మొదట్లో    బెంగగా,  బెరుకుగా ఉండేవాడు .
 పినతండ్రి  మంగయ్య గారికి  సంతానం  ఎక్కువ . పిల్లలతో  కళ కళ లాడే గృహం . 
ఇంచుమించు మంగయ్య గారి  పిల్లలు  వయసులో  పెద్దా , చిన్నా అయినా  తమతో  నాన్నని  కలుపుకొని  ఆదరించడం తో     బెంగ   కాస్త తీరింది .
 అప్పుడప్పుడు   మనసు  వంటిమామిడి  లోని  పచ్చని  పొలాలు,  జీడిమామిడి తోటలూ ,  ఇసుక దిబ్బలూ , ఘోషించే  సముద్రం,  తూర్పు  
 దిక్కున        శ్రీ రాజరాజేశ్వరీ విశ్వేశ్వర స్వామి  కొలువైఉన్న   యర్రమిల్లి వారి కుటుంబ  దేవాలయం , ఇంట్లోని  ఎల్లావులూ ,వాటి  లేగ దూడలూ  కేసి  పోయేది . అప్పుడు  ఎం తో  వెలితి గా  అనిపించి  నిద్రలో   తెలియకుండానే  కన్నీళ్ళు  కారేవి .
 తల్లి   ప్రతి  క్షణం  గుర్తుకు  వచ్చేది . తెల్లారితే  నిత్య క్రియలు ,  బడి,  పినతండ్రి  గారి పిల్లలతో  ఆటలు, పోటీలతో  గడిచి పోయేది .

... 

కాలం  గడిచిపోతోంది   ఏమీ  పట్టనట్లు . బుల్లి గారి ఆరోగ్యం కూడా మందగించ  సాగింది . విపరీతమైన ఆయాసం . పల్లెటూరు లోని వైద్యం  ఫలించలేదు.    మెరుగైన  వైద్యం  కోసం  కాకినాడ  వెళ్ళారు 
బుల్లి గారు .           

... 

 ఒకరోజు... 

దుమ్ము  రేపుకొంటూ  ఓ  కారు  బుల్లి గారి ఇంటి ముందు  ఆగింది . వేసవి కాలం . సూర్యుడు  అగ్ని గోళం లా  మండి  పోతున్నాడు .

 రాచ్చెర్వు   పొలంలో  ధాన్యం  కుప్ప  నూర్పిళ్ళు   చేయించుకొని  బాటలో  నడిచి  వస్తున్న  బుల్లి గారి  జ్యేష్ట  సోదరుడు  వెంకటచలం  గారి  కుమారుడు  సత్యం  గారు ( మా  సత్యం బాబయ్య)  తన  చిన్నాన్న  ఇంటి   ముందర  కారు ఆగిన  దృశ్యం  చూశారు .

 మా సత్యం  బాబయ్య  ధృఢ శాలి . సింహం లాంటి  గాంభీర్యం  . వెన్నపూస లాంటి  మనసు . సింహంలా  వడిగా  అడుగులేస్తూ  బుల్లి గారి  ఇంటి  వద్దకు  చేరుకున్నారు .

 కారులోంచి  బుల్లి గారు  దిగలేదు . 

 సన్నగా  రివిట  లా ఉండే  బుల్లి గారి  శరీరం  అంతటా  నీరు  పట్టి  కారు  డోరు  తెరుచుకొని    దిగటం 
 సాధ్య  పడలేదు. ఇది  గమనించిన  సత్యం   బాబయ్య  తన  బలం  ఉపయోగించి  కారు  తలుపు  ఊడ  బెరికారు .  మా నాన్న  అమాయకంగా  కారు  లోంచి  దిగి  జరుగున్నదంతా  చూస్తున్నాడు. 

బుల్లి గారిని  ఇంటిలోనికి  తీసుకొని  వెళ్ళి మంచం మీద పడుకోబెట్టారు  సత్యం బాబయ్య .    

'ఎలా  ఉంది  బుల్లి నాన్నా ' అన్నారు సత్యం బాబయ్య . 

నిర్లిప్తంగా  చూసేరు బుల్లి గారు . 

ఇంతలో  సత్యం గారి  భార్య  సీతాయమ్మ వచ్చింది . 

సీతాయమ్మని  చూశి  ' నా  చింత  అంతా  వీడి  గురించేనమ్మా ' అన్నారు బుల్లి గారు  మండువాలో స్తంభాన్ని     కావలించుకొని   ఉన్న మా నాన్నని  చూపిస్తూ .

' మీరు  అధైర్య పడకండి  మావయ్య గారూ . మేమంతా లేమూ ! ' అంది  సీతాయమ్మ. 

సీతాయమ్మ మా నాన్నకి వరస కి  వదిన అయినా  వయసు లో మాతృ సమానురాలు . మా నాన్నకి  సీతాయమ్మ అంటే అభిమానం , భక్తీ , గౌరవం . పెద తండ్రి కొడుకు  సత్యం గారంటే  భయంతో  కూడిన  గౌరవం. 

'నువ్వు  ఆ మాట  ఇస్తే  చాలమ్మా . పసితనం.   నిండా పదహారు  సంవత్సరాలు  వాడికి . లోకం తెలీదు . తల్లి  ప్రేమను చిన్న తనం  లోనే  కోల్పోయాడు . అదీ  నా  బాధ . ' అన్నారు  బుల్లి గారు .   

సమాధానంగా  ' చంద్రుడు  గురించి  ఏమీ  చింతన  చెందకండి  మావయ్యా. విశ్రాంతి తీసుకోండి  ' అని అభయం    ఇచ్చింది  సీతాయమ్మ . 

ఈ మాటలు విన్న బుల్లి గారు  ప్రశాంతం గా నిద్రపోయారు . 

అమాయకంగా , బిత్తరగా  చూస్తున్న మా నాన్నకి  జరుగుతున్నది  ఏమిటో  అర్థం  కావటం లేదు . 

అలా ప్రశాంతంగా  నిద్ర పోయిన బుల్లి గారు  మరి  లేవలేదు . 

యువ నామ  సంవత్సరం  చైత్ర  శుద్ద  మంగళ వారం  రాత్రి (16. 04. 1935 ) పదకొండు  గంటలకు  బుల్లి  గారు  శివ సాన్నిధ్యం  చేరు కొన్నారు . 

...   

తల్లీ , తండ్రిని  కోల్పోయిన మా నాన్నకు  భవితవ్యం  శూన్యం గా  గోచరించింది . ప్రపంచం  అంతా  చీకటి గా అనిపించింది .  విషయం  తెలిసి  మచిలీపట్నంలో  రెవిన్యూ  శాఖలో  పనిచేస్తున్న  మా పెద నాన్న సుబ్బులు  గారు  వచ్చి  తండ్రి  అంత్యక్రియలు కావించారు . 

... 

, 

వయసు లో తన కన్నా పదహారు  ఏళ్ళు పెద్ద  అయిన  అన్నగారంటే  మా నాన్నకి  ప్రేమ ,గౌరవం ,భయం .  మా పెద నాన్న  భార్య,  వదినగారైన   మృణాలిని  దగ్గర  చనువు . సుబ్బులు గారు  వంటిమామిదిలోని  భూ సంభందిత  ఆస్తి  వ్యవహారాలన్నీ పినతల్లి  సుబ్బమ్మ గారి  భర్త  అయిన   యర్రమిల్లి సుబ్బారాయుడు  గారిని  అజమాయిషీ  చేయవలసిందిగా  కోరి  తమ్ముడిని  తీసికొని  మచిలీపట్నం  వెళ్ళారు . 

... 

మా నాన్న స్కూల్  విద్యాభ్యాసం  కాకినాడ , గుడివాడ , మచిలీపట్నం (బందరు ) నగరాల్లో  జరిగింది . ఆతర్వాత  వివాహం  బోడపాటి  సత్యనారాయణ , రంగనాయకమ్మ  గారి తృతీయ  కుమార్తె   యశోదమ్మ తో  జరిగింది . చంద్రుడు గారి  కాలేజి  చదువు  మామ గారు సత్యనారాయణ  గారు  చెప్పించారు .   ఇంటర్మీడియట్  బరంపురం  కల్లికోట మహారాజా  వారి  కళాశాలలోను , డిగ్రీ  ఆంధ్ర విశ్వవిద్యాలయం , వాల్తేరు  లోను  చదువు సాగింది .

... 

మా నాన్న  ఇంటర్మీడియట్  పూర్తి  చేసే సరికి ఇద్దరు పిల్లల  తండ్రి .  1939 వ  సంవత్సరంలో  రాజప్ప , 1940 వ  సంవత్సరంలో  నేను  ఈ లోకంలో  కళ్ళు  తెరిచాము.  1943 వ  సంవత్సరంలో  మా నాన్న మమ్మల్ని  వంటిమామిడి  తీసుకు వచ్చి  కాపురం  పెట్టాడు .  అప్పుడు  రాజప్పకి మూడు నిండి  4వ సంవత్సరం  నాకు  రెండు నిండి  మూడవ  సంవత్సరం . అలా   వంటిమామిడి వచ్చి  స్థిర పడ్డాము . 

... 

మా  నాన్న  తన  బాల్యం  గురించి   డై రీలలో  వ్రాసుకున్న   మాటల     సంక్షిప్త  సారాశం :

' తెలిసీతెలియని  వయసులో  కౌసల్య  మాత  లాంటి  తల్లి ని  కోల్పోయాను . ఎవరూ  తీర్చలేని  లోటు . 

లోకాన్ని చదవగలిగిన వయసు  రాకముందే  దశరధుడు  లాంటి  తండ్రి  కళ్ళముందే  స్వర్గస్తులయ్యారు . ప్రపంచం  చీకటి అయిపోయినట్లు  అనిపించింది  ఆ  సమయంలో . ... 

 అన్నా , వదినా ఉండకపోతే  ఏమయి  పోయి ఉండేదో  ఈ  జీవితం . 

నాకు  ఓ సోదరి  కామేశ్వరి  ఉండేదని  తెలిసింది ఊహ తెలిసే  వయసులో .   సోదరి ప్రేమ ఎలా ఉంటుందో  నాకు  తెలీదు .  కారణం . నా జన్మకు ముందే  నా సోదరి సుమంగళి  గా  పోవటం .  ఈ లోటు  జీవితమంతా నన్ను భాధించింది . అందుకే .... పినతల్లి  చిట్టెమ్మ  కుమార్తె  లక్ష్మీదే వి  లో  అక్కయ్య  కామేశ్వ రి  ని   దర్శించు కొన్నాను . ప్రతీ  ఏడాదీ భగినీ పండగ నాడు     లక్ష్మీదే వి  అప్పయ్యని  సత్కరిస్తున్నాను .  ' 

  మా నాన్న  గతించిన  తర్వాత  డైరీలలో  నిక్షిప్త  పరచిన  ఈ  వాక్యాలు  నన్ను కలచి   వేశాయి . 

అప్రయత్నంగా   నా నోటి   నుండి   'పితృ దేవోభవః ' అన్న  మాట  వెలువడింది . 

నా బాల్యం  చాలా మధురమైనది . అది తెలుసుకోవాలంటే   తర్వాతి  భాగం  వరకు  వేచి చూడాల్సిందే  మరి . 

'''''''''''''''''''''''''''''''''''''''''''''''''''''''''''

   నైష్కర్మ్యానికి మార్గం .
'''''''''''''''''''''''''''''''''''' 

సకాలంలో  సత్కర్మలను ఆచరించటమే  నైష్కర్మ్యానికి మార్గం. కర్మే అకర్మణ్యతకు సాధన     మవుతుంది . ఆ పిమ్మట  పొంద దగినది  ఏమీ ఉండదు.  

'నడిచే  దేవుడు . '

శ్రీ శ్రీ శ్రీ  జగద్గురు  చంద్రశేఖరేంద్ర  స్వామి వారు .
శ్రీ కంచి కామకోఠి  68 వ పీఠాధిపతి.   

'''''''''''''''''''''''''''''''''''''''''
మిత్రులూ , బంధువులూ , శ్రేయోభిలాషులు అందరికీ ముందస్తుగా   సంక్రాంతి  శుభాకాంక్షలు . 

'''''''''''''''''